Exo 17 | TUCT | STEP | Ra eval tiina to Israel tipaburigin laghooŋ toozi muul. Tipul nugh ŋginaaŋa tau eeza ‘Siin’ na, ve tilaghlaagh itaghon Yoova aliiŋa. Tighamgham tauvene le tila tivot nugh ee, eeza Repidim. Ra timariau izi ta sewe. Eemon nugh tawe, le yaa mako.

aNam 20:2+

bYo 4:14; 1Kor 10:4

dHib 3:8

Exodus 17

Yoova igham yaa ivot ila maet

1 Ra eval tiina to Israel tipaburigin laghooŋ toozi muul. Tipul nugh ŋginaaŋa tau eeza ‘Siin’ na, ve tilaghlaagh itaghon Yoova aliiŋa. Tighamgham tauvene le tila tivot nugh ee, eeza Repidim. Ra timariau izi ta sewe. Eemon nugh tawe, le yaa mako.

2 Tauvene tiŋooŋ pa Mose tighe: “Ughita lemai yaa gha nighun lak!”

Mose iyol aliŋazi ighe: “Puughu mindai ta atemim yavyav ve aŋooŋ payau ne? Yam aghe atoov Yoova tapiri?” ^a

3 Eemon Israela murun zi le tisaghat kat. Tauvene tiyau avozi pa Mose tighe: “Puughu mindai ta ugham ghei nipul Isip, ve ugherev ghei nilam nugh tane? Ughe yei tomania natmaiŋa ve ŋgai tsiei nisov nimatmaat pa yaa ta sene?”

4 Tauvene Mose itaŋ rarai Yoova ighe: “O Yoova, ughita. Paita tamtamon tane tirav ghau pa maet! Pale nagham mindai pazi?”

5 Yoova iyol Mose aliiŋa ighe: “Ugham zolmana siriv to yes Israela, ve yamŋa amuuŋ alam tsiau izi loloz Sinai puughu. Saawe tau ulam na, matam iŋgal titi tsio tau ulos yaa Nil pani na, ve ukisi. Yau aat naleep izala maet tiina ee paavo, ve nasaŋan gham. Yam alam avot, mako ugham titi tsio, ve ulos maet tau nalepleep izala na. Yaa pale ireer ivot pani, leso eval tiina to Israel tighun.” Tauvene Mose igham zolman siriv gha yesŋa tila, ve tighita Mose ilos maet tiina tawe pa titi tooni itaghon Yoova aliiŋa, ve yaa ireer ivot. ^b

7 Nugh tawe, Mose iwaat eeza ighe ‘Masa’ ve ‘Meriba.’ ^{▼▼(17:7) Saveeŋ ‘Masa’, puughu tauvene: ‘tovaaŋ.’ Ve saveeŋ ‘Meriba’, puughu tauvene: ‘ŋoŋaaŋ’.}

Pasaa, saawe tau yes Israela tileep ta sewe, tiŋooŋ pani, ve titoov Yoova tighe: “I ileep tomani ghiit onoon, ma mako?” ^d

Yes Israela tiparav tomania yes Amaleka

8 Yes Israela tilepleep izi nugh Repidim, ve yes Amaleka tilam tighe tiparav tomani zi. 9 Tauvene Mose isaav pa Yosua ighe: “Uvureer tamtamon toit siriv tau tirao pa malmal, ve yamŋa agharaat gham. Leso bogzo ala aparav tomania yes Amaleka. Yau aat nakis titi to Maaron, ve nazala nayooz izala nugh mbua tawe.”

10 Tauvene Yosua itaghon Mose aliiŋa, ve igham yes Israela gha tila tiparav tomania yes Amaleka. Ve Mose yesuru Aron ve ŋeer ite, eeza Hur, yes tol tizala tiyooz ila nugh mbua. 11 Saawe tau Mose niima izaa, mako yes Israela tiliiv yes Amaleka. Eemon saawe tau niima ipaspas gha izi, mako yes Amaleka anazi tiliiv yes Israela. 12 Mose niima izaa ila ila le niima ipaspas kat. Tauvene Aron yesuru Hur tighita maet ee, ve tighur Mose mboole izala. Ra tiit niima ru izaa, ve ee ipalot niima tapir, ve ite ipalot ŋas. Tipaloti tuŋia, ve niima izazaa tauvene vene le aaz izila. 13 Tauta Yosua yesŋa yes Israela tiparav ariaaŋ pa mbuzaagh toozi, le tiliiv yes Amaleka.

14 Ra Yoova isaav pa Mose ighe: “Ulooŋ. Murei, yau aat napasov yes Amaleka pa taan le irau tamtamon matazi iŋgal zi muul mako. Aliŋag tane, uboode ila rau. Leso yes Israela matazi iŋgalŋgali taghon taghon gha ila. Ve usaav ariaaŋ pa Yosua, leso maata kisini paam.”

15 Yoova isavsaav le isov, ra Mose igharaat artaal ee, ve iwaat eeza ighe: ‘Yoova, i pilak tsiau.” ^{▼▼(17:15) Zaaba, yes lezi uuli ŋgereeta (o pilak) tau imin ilaal pazi. Saawe tau tila pa malmal na, tikis pilak toozi tawe, ve tilaagh tomania. Isaav ighe tiparav tomania koiazŋa le tiliiv zi, ve timuul tilam, ene titirtir pilak toozi toman tintinizi, leso eval tiina tiwatagh tighe tiliiv koiazŋa wa.}

16 Ve Mose isaav muul ighe: “Yes Amaleka tigham tinizi ve titotoi nimazi pa Yoova. Tauvene i tauu pale iparav tomani zi taghon taghon gha ila.”